Малітва да Святога Духа
Прыйдзі, Стварыцель Дух
Святы,
Наведай вернікаў сваіх,
Напоўні ласкай з вышыні
Сэрцы, што створаны Табой.
Названы Суцяшыцелем,
Ты — найвышэйшы Бога дар,
Жыцця крыніца і любоў,
І узмацненне нашых душ.
Ты спасылаеш сем дароў,
Бо маеш сілу ад Айца.
Праз Сына абяцаны нам,
Ты мноствам моваў прамаўляў.
Сваёю ласкай асвяці
Сэрцы і розум нашыя,
І целы нам аздараві,
І нашы цноты узмацняй.
Ты злога духа адгані
І супакоем адары,
Заўсёды за сабой вядзі
І прабачэнне грэшным дай.
Дай праз Цябе Айца пазнаць
І шлях да Сына пакажы.
Ты — Дух любові іх дваіх,
Верым Табе ва ўсе часы.
Богу Айцу хвала заўжды
І Сыну уваскрэсламу.
Суцяшыцелю, Табе
Хвала на вечныя вякі. Амэн.
Біблійнае чытанне: Мк 10,24-30
Ключавыя словы і фразы для разважання:
* «Хто ж можа збавіцца?»
* «У Бога ўсё магчыма!»
* «Той, хто ўсё пакінуў дзеля
Мяне атрымае ў сто разоў больш»
24 Вучні дзівіліся з Ягоных слоў. Але Езус зноў сказаў ім у адказ: «Дзеці, як цяжка тым, хто спадзяецца на багацце, увайсці ў Валадарства Божае. 25 Лягчэй вярблюду прайсці праз ігольнае вушка, чым багатаму ўвайсці ў Валадарства Божае». 26 А яны яшчэ больш здзіўляліся і казалі адзін аднаму: «Хто ж можа збавіцца?» 27 Езус, зірнуўшы на іх, сказаў: «У людзей гэта немагчыма, але не ў Бога; бо ў Бога ўсё магчыма». 28 І пачаў Пётр казаць Яму: «Вось мы пакінулі ўсё і пайшлі за Табою». 29 Езус адказаў: «Сапраўды кажу вам, няма нікога, хто б пакінуў дом свой, ці братоў, ці сясцёр, ці маці, ці бацьку, ці дзяцей, ці поле дзеля Мяне і дзеля Евангелля, 30 і не атрымаў бы ў сто разоў больш цяпер, у гэты час, дамоў, братоў, сясцёр, маці, дзяцей і палёў сярод пераследу, а ў будучым веку — жыццё вечнае.
Чытанне святога Людвіка дэ Манфора: Любоў Спрадвечнай Мудрасці 194
Ключавыя словы і фразы для разважання:
* «Мудрасць цела варожая Богу»
* «Тыя, што ідуць за Хрыстом, нясуць свой крыж кожнага дня»
* «Трэба практыкаваць
утаймаванне цела, вырачэнне свету і самога сябе»
[194] «Мудрасць, кажа Святы Дух, нельга знайсці сярод
тых, што жывуць у раскошы, якія знаходзяцца ў палоне сваіх пажадлівасцяў і
дрэнных звычак. Таму што тыя, што жывуць паводле плоці не могуць падабацца Богу;
і мудрасць цела варожая Богу (пар. Рым 8). Мой Дух не будзе заўсёды жыць у
чалавеку, таму што ён з’яўляецца целам… » (пар. Ёў 28).
Тыя, што належаць Езусу Хрысту, Уцелаўлёнай Мудрасці, укрыжавалі свае целы разам з заганамі і пажадлівасцю, яны носяць цяпер умярцвенне Езуса ў сваіх целах, увесь час сябе ўтаймоўваюць, нясуць свой крыж кожнага дня, і нарэшце, яны памерлі і нават былі пахаваныя ў Езусе Хрысце. Гэта словы Святога Духа, якія вельмі ясна паказваюць, што, каб мець Мудрасць, Езуса Хрыста, трэба практыкаваць утаймаванне цела, вырачэнне свету і самога сябе.
Пытанне: ці я верны штодзённай малітве і штонядзельнай святой Імшы?
На заканчэнне: малітва святога ружанца.
