Малітва да Святога Духа
Прыйдзі, Стварыцель
Дух Святы,
Наведай вернікаў сваіх,
Напоўні ласкай з вышыні
Сэрцы, што створаны Табой.
Названы Суцяшыцелем,
Ты — найвышэйшы Бога дар,
Жыцця крыніца і любоў,
І узмацненне нашых душ.
Ты спасылаеш сем дароў,
Бо маеш сілу ад Айца.
Праз Сына абяцаны нам,
Ты мноствам моваў прамаўляў.
Сваёю ласкай асвяці
Сэрцы і розум нашыя,
І целы нам аздараві,
І нашы цноты узмацняй.
Ты злога духа адгані
І супакоем адары,
Заўсёды за сабой вядзі
І прабачэнне грэшным дай.
Дай праз Цябе Айца пазнаць
І шлях да Сына пакажы.
Ты — Дух любові іх дваіх,
Верым Табе ва ўсе часы.
Богу Айцу хвала заўжды
І Сыну уваскрэсламу.
Суцяшыцелю, Табе
Хвала на вечныя вякі. Амэн.
Біблійнае чытанне: 1 Кар 11, 23-26
Ключавыя словы і фразы для разважання:
* «Гэта
Эўхарыстыя»
* «Гэта
Маё Цела»
* «Гэта
келіх Новага Запавету ў Крыві Маёй»
* «Ешце гэты хлеб і піце з гэтага келіха»
23 Я прыняў ад Пана тое, што і вам перадаў, што Пан Езус у тую ноч, калі быў выданы, узяў хлеб, 24 узнёс падзяку, паламаў і сказаў: «Гэта Цела Маё, якое за вас будзе выдана. Гэта чыніце на Маю памяць». 25 Таксама ўзяў пасля вячэры келіх, кажучы: «Гэта ёсць келіх Новага Запавету ў Крыві Маёй. Кожны раз, калі Яго будзеце піць, чыніце гэта на Маю памяць». 26 Кожны раз, калі будзеце есці гэты хлеб і піць з гэтага келіха, абвяшчайце смерць Пана, акуль Ён не прыйдзе.
Чытанне святога Людвіка дэ Манфора: Любоў Спрадвечнай Муудрасці 71
Ключавыя словы і фразы для разважання
* «Уцелаўлёная
Мудрасць знаходзіць цудоўную таямніцу, каб памерці і жыць сярод нас».
* «Гэтае
поўнае любові ўстанаўленне Эўхарыстыі»
* «Яна
хаваецца пад выглядам маленькага кавалачка хлеба»
[71] Жадаючы з аднаго боку паказаць сваю любоў да чалавека і памерці замест яго, каб уратаваць, і не жадаючы з іншага боку вырашыцца на тое, каб пакінуць чалавека, Яна знаходзіць цудоўную таямніцу, каб памерці і жыць адначасова, а таксама застацца з чалавекам да канца часоў: гэта поўнае любові ўстанаўленне Эўхарыстыі. Каб цалкам задаволіць сваю любоў у гэтай таямніцы, Яна з лёгкасцю змяняе і пераварочвае сваю натуру. Калі Яна не хаваецца ў ззянні дыяменту або інашага каштоўнага каменя, то гэта таму, што Яна не жадае толькі вонкава прабываць з чалавекам. Але Яна хаваецца пад выглядам маленькага кавалачка хлеба, які з’яўляецца звычайным харчаваннем чалавека, каб спажытая чалавекам, Яна магла ўвайсці ў яго сэрца і скаштаваць яго слодыч. О, Спрадвечная Мудрасць, кажа святы, о тысачакроць дзівосны Бог, шчодры ў сваім прагненні чалавека».
Пытанне: ці часта ты ходзіш на Святую Імшу і прымаеш Святую Камунію? Колькі часу ты праводзіш перад Найсвяцейшым Сакрамэнтам?
На заканчэнне: малітва святога ружанца.
